ՀՀ ոստիկանության քրեական հետախուզության գլխավոր վարչության պետի առաջին տեղակալ Հովհաննես Թամամյանի նկատմամբ հարուցվել է քրեական գործ։ Այս մասին հայտնի դարձավ 2008 թվականի մարտի 1-ի իրադարձությունների հետ կապված վարույթի շրջանակում ձեռք բերված փաստական տվյալների հիման վրա։
Քննչականի հատկապես կարևոր գործերի քննության գլխավոր վարչության կողմից հարուցված քրեական գործի համաձայն՝ 2008 թվականի մարտի 1-ի վաղ առավոտյան Հովհաննես Թամամյանը, ապա ոստիկանության քրեական հետախուզության գլխավոր վարչության պետի տեղակալ, առանց հիմնավորման հանձնարարել է ոստիկաններին բռնություն գործադրել Երևանի Ազատության հրապարակում ընթացող հանրահավաքի մասնակից Է․Ա․-ի նկատմամբ և նրան տեղափոխել ոստիկանության կազմակերպված հանցավորության դեմ պայքարի գլխավոր վարչություն։
Ըստ հաղորդագրության՝ ոստիկանության ծառայողները, կատարելով իրենց լիազորությունների շրջանակից դուրս գործողություն, ձեռքերով և ոտքերով բազմաթիվ հարվածներ են հասցրել Է․Ա․-ին՝ պատճառելով կյանքի համար վտանգավոր ծանր վնաս։
Հ․Թ․-ի նկատմամբ հարուցվել է հանրային քրեական հետապնդում՝ 2003 թվականի քրեական օրենսգրքի 38-309-րդ հոդվածի 3-րդ մասով (պաշտոնեական լիազորություններն անցնելուն դրդելը)։ Նա ձերբակալվել է դատարան ներկայացնելու նպատակով։ Նախաքննությունը շարունակվում է։
Հրապարակումներում նշվում է, որ 2008 թվականի «Մարտի 1»-ի գործի շրջանակում ՀՀ Հակակոռուպցիոն կոմիտեում նույնիսկ 2021 թվականին որոշում էր կայացվել Թամամյանի նկատմամբ քրեական հետապնդումը դադարեցնել՝ վաղեմության ժամկետն անցնելու հիմքով։ Նույն գործի շրջանակում նախկինում հրապարակվել էին մի շարք բարձրաստիճան ոստիկանների անուններ, որոնց նկատմամբ գործերը նույնպես կարճվել էին վաղեմության հիմքով։
