Արդեն մի քանի ամիս է՝ Ռուսաստանն արգելել է Հայաստանից պտուղ-բանջարեղենի ներմուծումը։ Պետական մակարդակում հաճախ հնչում են պնդումներ, թե այս արգելքը շրջանցելու ուղիներ են գտնվել, սակայն իրականությունը շատ ավելի բարդ է, քան պարզապես հայտարարությունները։
Իմ աղբյուրների համաձայն՝ ռուսական արգելքը շրջանցելու համար հայկական ելակը, ըստ էության, արտահանում են Վրաստան։ Այնտեղ այն վերանվանում են «թուրքական» և այնուհետև արտահանում Ռուսաստան։ Այս ճանապարհը, սակայն, չի օգտագործվում բոլոր արտահանողների կողմից, և այն հիմնականում կապված է որոշակի ջերմոցային համալիրների հետ։ Իմ տեղեկացմամբ՝ այդ համալիրներից մեկը կապված է Տիգրան Ավինյանի ընտանիքի հետ։
Այսպիսով, թեև պաշտոնական մակարդակում պնդում են, թե արգելքը չի ազդում արտահանման ծավալների վրա, իրականում գյուղատնտեսական ոլորտում տեղի ունեցող իրադարձությունները շատ ավելի մարտահրավերներ են առաջացնում։
Արարատյան դաշտավայրում, որտեղ սկսվել է ծիրանի բերքահավաքը, գյուղացիները զարմանալի իրավիճակի են հայտնվել։ Երեկ ես անձամբ լսեցի Սուրենավան և Արմաշ գյուղերի բնակիչներից, որ ամեն տարվա պես սպասվող զանգվածային արտահանումը չի տեղի ունեցել։ Գյուղերից մեկ-երկու ֆուռ է միայն մտել։ Ավելի ցավալի է այն, որ գյուղացիներից ծիրանը գնում են աննախադեպ ցածր գնով՝ 400-500 դրամով։
